योगेश घायवट जिल्हा प्रतिनिधी
अकोला : संपत्तीच्या वादातून कुटुंबातील एकाची हत्या केल्याची घटना अकोल्यातील पातूर तालुक्यातील भंडारज खुर्द येथे समोर आली. दरम्यान, भंडारज येथील इंगळे कुटुंबातील एका ३६ वर्षीय युवकानं आत्महत्या केली असून याची माहिती कुटुंबीयांनी पोलिसांना न देता परस्पर त्याच्यावर अंत्यसंस्काराची तयारी सुरू केली. परंतु मृतकाची पत्नीने वेळीत पोलीस स्टेशन गाठले अन् पोलिसांच्या सतर्कतेनं हा अंत्यसंस्कार थांबवला. मिलिंद तुळशीराम इंगळे (वय ३६) असं या मृत व्यक्तिचं नाव असून आता वैद्यकीय अहवालात मिलिंदचा गळा आवळून खून केल्याचे स्पष्ट झाले. दरम्यान, संपत्तीच्या वादातून मृतकाच्या काका अन् काकूने मारहाण करून त्याची हत्या करण्यात आली. त्यानंतर मिलिंदची आत्महत्या वाटावी यासाठी गळफास घेतलेल्या अवस्थेत टांगले. इतकेचं नव्हे तर त्याची पत्नी पोहचेपर्यंत अंत्यसंस्काराची तयारी देखील सुरू केली.
अकोला जिल्ह्यातील पातूर तालुक्यातील भंडारज खुर्द येथील मिलिंद तुळशीराम इंगळे (वय ३६) यांनी ३० ऑगस्ट रोजी दुपारी गळफास घेऊन आत्महत्या केल्याची माहिती माहेरी रिसोड येथे असलेल्या त्यांच्या पत्नीला कळविण्यात आली. मृतकाची पत्नी गावात परतल्यानंतर तिला संशय आला. त्यामुळे तिने पातूर पोलिसांना सोबत घेऊन गाव गाठले. परंतु, ती गावात पोहोचण्याच्याआधीच मृतकावर अंत्यसंस्कार करण्याची तयारी कुटुंब आणि गावकऱ्यांनी केली.
दरम्यान, अंत्यसंस्काराच्या वेळेवर बुधवारी सायंकाळी मृतकाची पत्नी पोलिसांना घेऊन पोहोचल्याने अंत्यसंस्कार थांबवण्यात आला. पातुर पोलिसांनी मृतदेह ताब्यात घेऊन शवविच्छेदनासाठी पाठविला. आता वैद्यकीय अहवालानंतर मिलिंद इंगळे यांनी आत्महत्या केली नसून त्यांना मारहाण करून गळा आवळून त्यांची हत्या केली अन् गळफासावर लटकवून आत्महत्या केल्याचा बनाव केला, असं स्पष्ट झालंय. या प्रकरणी पातूर पोलिसांनी खुनाचा गुन्हा दाखल केला. पुढील तपास सुरू झाला असून तपासादरम्यान काही धक्कादायक गोष्टी समोर आल्या. मूर्त मिलिंद इंगळे यांची हत्या त्यांच्या काका-काकूनेच केल्याचं समोर आलंय.
