*💪*स्वतःमध्ये आत्मविश्वास कसा निर्माण करावा*

सा. भुमीराजा न्युज चॅनल नांदेड
दिनांक- 09 /04/ 2023

व्यक्तीच्या एकंदर जडणघडणीत आत्मविश्वास महत्वाची, प्रभामी भूमिका पार पडतो. ‘व्यक्तीच्या कष्टाला जेव्हा आत्मविश्वासाची साथ लाभते तेव्हा यशाची हमी दुप्पट होते’ असं म्हणतात. व्यक्तिमत्वाचा हा पैलू व्यक्तीला एका वेगळ्याच उंचीवर नेऊन ठेवतो. ज्यामुळे चारचौघात व्यक्ती उठून दिसते. काही गोष्टी टाळून, काही सवयी बदलून आत्मविश्वास वाढवणं सोप्प आहे. तर हा आत्मविश्वास नेमका वाढवायचा कसा यासाठी काही टिप्स.

* *आत्मविश्वास हा बऱ्याचदा किंबहुना नेहमीच संवादातूनही उमटत असतो. त्यामुळे प्रभावी बोलणे गरजेचं असते. त्यासाठी चांगले विचार, माहिती असणं अधिक महत्वाचं. आणि त्यामुळेच दर्जेदार वाचन गरजेचं. शिवाय वाचनाने माणूस समृद्ध होतच असतो ते वाया जात नाही. त्यामुळे नेहमी काही न् काही वाचन करत राहावं.*

आयुष्यात बऱ्याच प्रसंगी आपण वाजवीपेक्षा जास्त विचार करतो. त्याचे प्रमाण शक्य तितक्या लवकर कमी करावे. कारण अति विचाराने आपण कळत-नकळत नकारात्मक विचार करणं सुरू करतो. आणि नकारात्मक विचारांच्या जोडीला आत्मविश्वास बसत नाही. त्यामुळे ओव्हरथींकिंगचा वेळ इतर गोष्टींसाठी सदुपयोगात आणावा.

कोणतेही नवीन काम सुरू करताना ततपप न करता विश्वासाने सुरुवात करावी. आरशासमोर उभे राहून स्वतःचा उदो उदो केला तर उत्तम (पण प्रमाणात). ‘मी ग्रेट आहे’, ‘मला हे नक्की जमेल’, ‘वाटतंय तितकं अवघड नक्कीच नाही’, ‘यापूर्वीही आपण अनेकदा अवघड कारनामे केलेले आहेत’ वैगेरे वैगेरे…काम नक्की होतं(चिकाटी, आकांक्षा असेल तर)..त्यातून निर्माण होणारा विश्वास पुढची अनेक कामं पार पाडतो.

स्पर्धेच्या युगामध्ये इतरांशी स्पर्धा करण्यापेक्षा स्वतःशी करा. कारण स्पर्धा जेव्हा स्वतःशी असते तेव्हा आपल्या उणीवा आपल्या समोर असतात. त्यामुळे मागे केलेल्या चुकीची पुनरावृत्ती टाळता येते. व काम फत्ते होण्यास मदत मिळते.

शक्य असल्यास थोडे पैसे स्वतःच्या पेहरावावर खर्च करताना जास्त विचार करू नये. कारण चांगल्या पेहरावामुळे स्वतःला तर छान वाटतच, पण पाहणाराही अजाणतेपणे आपल्याकडे आकर्षित होतो.

आपल्याविषयी जग काय विचार करतं हा विचार तर अजिबात करून वेळ वाया घालवू नये. कारण त्यावर आपला अंकुश नसतो. शिवाय त्याचा मानसिक आरोग्यावर विपरीत परिणाम होतो.तुम्ही स्वतःविषयी काय विचार करता ते महत्वाचं. शेवटी कुछ तो लोग कहेंगे, लोगों का काम है कहना…

आशा करते की ह्यातून तुम्हाला काहीतरी मदत होईल…

✍️✍️-  मारोती अक्कलवाड पा. सवनेकर
जिल्हा संपादक नांदेड
संपर्क- 9763126813